一心打算放租單位可以賺租金幫補下，點諗到不但損失租金，仲可能畀人搞到一屋亂曬，要貼錢裝修？年年都見到唔少關於租霸嘅新聞，成塊地板畀人撬起咗、帶埋刀槍上門報復、一屋發霉食物…佢哋嘅破壞力永遠超乎我哋想像！對住呢班「惡人」，唔通真係要「買佢怕」？身為業主嘅您又可以點自保？
1. 了解租客背景
簽約前先了解租客嘅人數、有無養寵物，並提供入息證明同信貸報告等，確保佢有一定嘅繳租能力。記得上網check埋「租霸list」啊！咁就可以完美避開曬所有租霸啦~
2. 簽約前釐定全面合約條款
合約內所有條款都應該得到雙方同意並白紙黑字喺租約列明，並將簽好嘅租約送去稅務局蓋釐印，增加法律效力。最好叫埋租客提早畀2個月租金做「按金」同埋1個月租金做「上期」保障自己啊！
3. 定期視察及購買保險
定期上去檢查物業有無被破壞，有嘅話就要了解情況並要求合理賠償，甚止提前終止租約，及時止蝕！您更可以考慮購買一啲有「防租霸」條例嘅家居或出租物業保險，萬一有起咩事上嚟都可以索償~
多年嘅努力先可以換到一個屬於自己嘅物業，大家又點忍心見到佢畀人食「霸王餐」或者被破壞呢~ 唔好見佢係專業人士或者有一家大細就掉以輕心啊！隱形租霸可能就埋伏喺您身邊！做足事前功夫再加定期檢查，雙管齊下就最有保障啦~
參考資料來源：
-----------------------------------------------------------
想知更多按揭TIPS，快啲追蹤& like我哋嘅198專頁，緊貼最新金融走勢啦!
Hozzászólások